غدر الزمن - طراد السويدي
ياصاحبي غدر الزمن طال واجتال
لازم خفوقي من بداية حياته
عشت القسى والمر بالوان واشكال
عجزت اميز يارفيقي صفاته
ساقتني الاقدار والحظ بي مال
حظ ٍ ردي والروح تطلب نجاته
عشت العمر محروم والهم بي طال
وعيوني اللي فوق خدي عبراته
ياوجد حالي وجد عوداً ردي حال
قفى عن الدنيا وخلى بناته
ماذكرلهن عم ٍ ولا شافن الخال
وأكبرهن اللي تو تلبس عباته
هذا قليل ومابقى يتعب الحال
والله عليم بسيته وحسناته
عزاي اني ليا ارتفع صوت رجال
وقت اللقاء مايصيح ينخا خواته
عزيز نفس وله مع العرف مدخال
مؤمن بربه وخاشعٍ في صلاته
يوم أشتكي ياخوك ماني بمحتال
مير الزمن طول علي بلتفاته
أن طال جوره بقضي العمر رحال
وأشيل هم القلب حتى وفاته