يمّك مسافاتي - عبدالعزيز الزهراني

مشيت مدري وين تنقلني اخطاي
اعاني الفرقا صباحي وعصري

اهيم بدروب الزمن واعزف الناي
لحن المفارق وامتطي خيل فكري

واكتب بيوت الشعر واصوغ معناي
من لوعة في خافقي هل شعري

هم طواني طي واسرج لبلواي
حتى سمعت انات قلبي بصدري

ياشوق قلبي يامناتي ورجواي
من غيبتك عن دنيتي مل صبري

اعيش في ذكراك عيشي بذكراي
وتذكري في ماضي الوقت عطري

وان مت هلي دمع عينك لفرقاي
واتذكريني لا مضيتي بقبري

يا خارطة عمري ويا كل دنياي
يا ملهمة شعري ويا كل نثري

يمك مسافاتي ودربي ومجراي
وانتي الاماني اللي على البال تطري

الحزن كله ساكن في حناياي
يا خل لوفي حالتي اليوم تدري

مديت لك بالحب ياشوق يمناي
ونوخة لك بالطيب قلبي وفكري

انا اسيرك يامنى الروح برضاي
لا تطلقيني واحكمي اليوم اسري

انا لك الدنيا من ادناي لقصاي
وانتي لي الفرحه وانفاس فجري

الصمت يضوي ياغلا في شفاياي
لا مرني طاريك والعمر يجري

في قسوة الايام حزني ومنفاي
احن لك واشتاق يا شمس عمري

يالنادره هذي بيوتي وشكواي
وانت الحكم فيني وبيديك نصري

عودي ولا ترسي على غير مرساي
ولا تقولي عاده الوقت بدري

عودي واقضي باقي العمر وياي
واهنا بشوفك في صباحي وعصري