المقام السامي - عبدالله الظفيري

ياباذخه ف الحسن.. ياسنيوره
عشقك: وطن... في داخلي مترامي

يا غاية الشعر وضفاف بحوره
واسمى المعاني في حضور إلهامي

يااحلى تفاصيل المسا وحضوره
شفتك؟؟ وضاعت حسبتي وأرقامي

ماشفت لك أشباه ف (المعموره)
مثلك ! فلا قد مر في أحلامي

يومك غديتي بالجمال اسطوره
ما صوّرتها ريشة الرسامي

سبحان منهو صوّرك هالصوره
وسبحان يوم انْكَسْتْ لك أعلامي

ياطاغية في الحب يامغروره
يا اللي قتلتي جرأتي واقدامي !

الشوق ثاير في عروقي ثوره؟ !
والروح دونك تعلن استسلامي !

كل المشاعر لك بَنَت مقصوره
في وسط قلبي من ركام حطامي

من حسن حظي صرتي الدكتوره
وانتي سبايب علتي وآلامي ! !

كل ما طعنتي.. قلت أنا معذوووره
حتى عشقت اسلوبك الإجرامي !

وكل ما نشف دمي لنزف شعوره
اشتاقت أوراقي لنزف أقلامي

يا ام الحلا وام الترف وغروره
كثر الرجاوي زوّدت بأوهامي

القلب بيتك.. والأماني سوره
والموت رمشك.. والأمل قدامي !

آمال تبنى من غلاك قصوره
لا تهدمين اللي انبنى بأعوامي

أدري بأن اليأس ماخذ دوره
بس المصيبه ماتطيع أقدامي؟؟

ماجيت أبحكي لك أنا فزوره
هذي حقيقة واقعي وأيامي

ياما شكيت من الغرام وجورهأرجي البراءه / ينحكم بإعدامي !

خلي الأمور الماضية مستوره
وإن ضايقك حكيي.. ماهو بإلزامي

منتي على ماقيل (دكتاتوره)
واللي تبينه افعلي... مادامي:

من كل قلبي قلت لك: مشكوره
وأسمى التحايا.. للمقام السامي