طواري (2) - عبدالله الظفيري

يرحم اللي بمولدك سماك "سامي"
سامي بطبعك .. وعن رد الخطا.. !

يافخر ربعك وهلْك وياحزامي
ترخي أهدابك على احبابك غطا

صغر سنك يفضح كبار الأسامي
يوم في كل القلوب اسمك سطا

ما ليمناك أي صفه توجز كلامي
دام تعطي ولا تبي رد ال(عطا) !

***

تعاااال نجلس فوق هذا الهم .. حط راسك هنا
مدري ! ولا تسأل من اللي يستحق الإتهام ؟ !

ياطفلي اللي صرت له أم قبل مااكبر وأنا..
طفله.. وكل أحلامها تركض وتلعب في سلام !

غمض عيونك لا تراقب ما حصل.. (والله لنا)
وان كنت تعجز عن عيونك؟ غمض أحزانك وناااام !

***

[ أزريت ] يا دنيا لو إنك زايله !
من وين ماطقيت.. شفتك مايله !

والحظ؟ عطني حظ وارميني بحر
والهم هان ان كنت وحدك شايله !

حتى المرض.. تبلش به وكيفك معه
بس الفقر .. تبلش ورانا عايله !

***

يعني معقوله على اللي جاك مني ماكفاك؟ ! !
رح إذا ودك تفارق.. وان ترجيتك خطااااا ..

لكن اعرف لو تلاقي من يحسّسك بغلاااك ؟
ماتلاقي شخص مثلي.. يسرف بحبك عطاااا !

***

ادعي ربك وارفعي كفوفك وقولي:
"ياالله اتخلي لي عبدالله الظفيري" :)

***

كم كنت شايل همّ شوقي بفرقاك..
وانتي -غلاك- اللي عمل بي عمايل !

واليوم "خايف" لا تعلّق برجواك..
واصبر.. ولاشوف الصبر فيه طايل

إما تطفّي لهفة الشوق (لقياك)؟
وإلاّ بلاش من الغلا والرسايل !

***

هو صحيح [العلم نور] أدري.. ولكن !
انتي اللي - تطوقين - العلم .. نووور

***

يوم اشبعت من ذل الأجناب.. حنّت !
يوم انكوت.. جت بانكسار وتعاني

جتني ولاادري ويش يافهيد ظنّت
تاْشّر لقلبي.. تقول: هذا مكاني !

عقب الفراق وبعد ماهي تجنّت
ليه ارجعت بعد اغتيال الأماني؟

***

تزعل .. وتبعد.. واتّغلّى.. على شان
أسهر لعين رضاك واكتب قصيده !

ونبقى كذا شهرين صحبه وخلاااان
وفجأه تغيب ان كنت تبغى جديده؟

دق الجدار براسك ان كنت زعلان
وابعد.. وهمّي صار قربك يزيده

يعني بصراحه قدرك الحين يافلان
أتفه.. من اني فيك أكتب قصيده !

***

ياخالد اسكت لاتقول اللي حصل يكفيني
لا ما يكفّي هالخبيث ان حالته معتفسه

ياخوي قاهرني.. وأنا لو جيت أمد ايديني
أبْدا فلا يشفي غليلي كم طراق ورفسه !

من كثر ماكان ايتكلم بالخفا .. يعنيني..
ان قاله الله لاتركه يمشي ويكلم نفسه !