جنون الإلتياع ! - عبدالله العلي

من اول بدايات الغلا لخر جنون الالتياع
تشوف حبك وسط قلبي حنين تسمعه

مدري تغلي او تعالي او تّهور باندفاع
يوم ٍ سالتيني سؤال بلا اجابه مقنعه

كان السؤال اللي يجي من باب حب الاطّلاع
ترى جوابه ينترك ياهيه من باب السعه

لو هي هبايبها تّرد الريح رغبات الشراع
لابد في اخر هبايبها لمساره تدفعه

ياهيه ماودك نحل جذور سالفة النزاع
اللي بها بعض العواذل شامته مستمعه

يعني حرام اشواقنا ينهيها مر الإمتناع
واّلا الشفوق اللّي يهيم بورد خدك تمنعه

لا لاتقولين ابتعد ما اطيق طرياه الوداع
عندك معاليق الغلا مفتاحها ومستودعه

لو تطلبيني اطلبي لكي تطاع المستطاع
اما فراقك مستحيل..افكار جدا مفزعه

ابعترف لك يختلف احيان عنك الانطباع
احيان تفكيرك ذكي احيان احّسك امّعه

لكن قلبي اعلن لحبك خضوع الانصياع
لن الغلا كل الغلا وسط الغلا متربعه

تعني لي اكثر مماتعني اللقمه افواه الجياع
ارجيك اكثر من رجا الزراع ثمار المزرعه

الشوق والغربه ثلاث اللي يحسون الضياع
اثنين ضرب اثنين ضرب اثنين تقسيم اربعه

يعني اختصار السالفه خلي جنون الالتياع
نعيش به باقي العمر واللي يجي معه..معه