على إيقاع جرح - عبدالله الملحم
عبّري بالرّقص عن قصّة حياتك
إرقصي لا صارت ايّامك جروح ..!!
من خلقهاْ الله وهي تملك صفاتك
ماخلقهاْ الله لغير الله تبوح
كل حزنٍ فات منّك .. يوم فاتك
راح أدري .. وادري انّه ما يروح
إستبدّي في انسجامك لين ذاتك
تخشع لْصخْر الثرى .. ويصير دوح !
عبّري .. قولي ولو بعض امنياتك
كود اعدّ خْطاي في ذيك السفوح
وآتهجّاني بخصرك ..وفْ.شتاتك
ألتقي بي كل ما برقك يلوح
الموسيقى .. صرخة لْغيرك وجاتك
والجسَد .. تعبير عن آهات روح !!
والدّروس اللي لفَت زادت غلاتك
ياعتيم الصوت .. يا صمت الوضوح :
القناعة والأمل جملة غناتك
والفقر في قِل عزمك والطموح
والرّدى أحيان يكمن في رداتك
لا تركت القلب مستسلم ينوح !
إرقصي تعبير عن قصّة حياتك
إن رقصتي جرح .. وان طبتي جروح !