نفس الغرض ..! - عبدالله الملحم
إنّ الهموم اكبر من اللي مفترض ..
وانك وحيد بْ صحتك أو في المرض ..
وانّ الزمن مدري على إيش طاير ..
وانّ اليقين احيان يخليك حاير ..
وانّ احتياجاتك تلف ابْك وتدور ..
ومهما العمر عدّى ولا هدّى .. و راح
ومهما تجرّعت بزمانك من جراح ..
يبقى الغرض في داخلك .. نفس الغرض !!
إنسان ..!! قلّلي وشهو الإنسان ؟
أدَاة ؟؟ .. آلَة ؟؟ .. تراب .. ؟؟
أو كلمة تعني عذاب .. ؟
أو حلم (مخلوق) انقرض ؟؟
يا إنت .. يا (مثلك) ..
ياكثر حلمك على حملك على مْتونك ..!
و يا كثر ما غرّت وعرّت بك عيونك ..
متى تحس انّك : (تحس انّك .. خلاص) ..؟؟
ماعاد باقي لك من الواقع خلاص .. !
حتى ولو مليون وياّك اعترض !!
بعض الحزن يا سيّدي يحميك من سذجك
بعض الطهر يا سيّدي أنجس من الغربة
وبعض العذاب افراج .. لو كانه يحَرْجك !!
طوّلت تبحث عن مسا / ما مات في دربه !!
وكل المسامات تمنعك في الآخر :
ومهما العمر عدّى ولا هدّى .. و راح
ومهما تجرّعت بزمانك من جراح ..
يبقى الغرض في داخلك .. نفس الغرض !!