أمطري - عبدالله الملحم

أمطري .. أمطري
لحّني (صوت الهدوء) .. وعطّري
كل ما باقي امْن العام .. أصلاً وش بقا ؟؟
من صفاة قلوبنا إلا قليل !!
ومن فرح إلا قليل !!
ومن أمل ..
ومن خداعٍ ليته كما غيره قليل !!
أمطري ..
واغسلي همٍ بصدر الخلايق
واغسليني .. آآآه
وش كثر الغبار ؟؟ .. ووش كثر هالبال ضايق !!
أحلى ما فِ الكون انا ..
وسيم .. رايق .. وجهي بشوش !!
واكبر الأطفال انا ..
بريء .. يلعب .. "خوش" .. "خوش"
أرضي ماهي ل اْجنبي .. ولا تهددني وحوش !!
بس امطري ..
يا عيوني أمطري !!
كل ما شفتك بثوب العفّة الصافي .. أخونك !!
وكل مافيني يخونك
وكل ما يلزم لعيشي والرغيف .. يشغلوني
ويشغلونك !
وآتعرّى لك بصدري
لهفةٍ منّي ومن هم
والمَسك مذنب .... وكذّاب
إيه اصلّي .. إيه اصوم .. إيه ما أغتاب
إيه احب الروح والأطفال والأنثى .. وإنتي
إيه احب الأرض واللا أرض .. والقيد .. والبرد الشديد !!
إيه احب الساحل اللي كم يودّيني بعيييد .. وما يودّيني أبد .. !
ليه ؟؟
وليه لا صرتي غيوم .. يطير من صدري بلابل ؟
.. وكل من عاقد حجاجه .. أشعر انّه مبتسم لي
واحسد بنفسي .. والخبط بين كلْ حابل ونابل
.. وانتشي وارقى بعيدٍ .. وآنا جالس في محلّي
ليه .. ؟ لا صرتي غيوم .. اصير انا إنسان قابل
.. للتمدد .. والتعدد .. ويلتقي كلّي ب كلّي
أمطري .. خليني امسي عاشقٍ روّح يقابل
.. هالطبيعة بوجهٍ احلى .. وقلب (من قلبه يهلّي)
جرعتي منّك دخيلك .. زخّة التطهير وابل
.. إنتِ لك ناسٍ كثير وبس غيرك آآه .. مَن لِي ؟؟
أمطري يابنت عذرا ماْظهرت من شور اهلها
أمطري أمٍ حنونه .. ربّت وكلٍ سألها
أمطري هالأرض جردا .. رغم كلّ الإخضرار
إظهريها من كسلها .. واعطي القنديل (نار)
أمطري مابين خوفي لين أقصى إنتصاري
مهدّيني لي ..
واعطي قوّتي "صحّة قراري" !!
أمطري