خبر عاجل
وشلون ابكتب عاطفه أو محبّه ؟
والوقت مستخدم جثث ناسه ايقاع

نفس الرتم يمشي ولاهي مسبّه
لو قلت في لحم البشر لقمة اجياع

تغيّر احساسي .. وانا كنت اشبّه
واطفيه في بحر القصايد والاوجاع

واصبحت أتنرفز ولو من مهبّه
واعقد حجاجي غضب من هالاوضاع

واقسى على منهو خفوقي يحبّه
واشفق على كوكب ظلم نفسه وماع

واعيش في حالة قلق ماتشبّه
إلا بطفلٍ نايمٍ .. فاق مرتاع

وامست حياته بعدها تلتهب به
متوتّرٍ والخوف ممسي ف الاطباع

يتوقّع المكروه من غير سبّه
وش حيلة العصفور والعصف جزاع ؟

منهو يغَرْف الما ؟ .. ومنهو يصبّه ؟
لجل الضما نشرب قراح الذي باع

وان كان في من يجرح القلب طبّه
لا جرحنا منّه .. ولا طبّه الصاع

البارحه كنّ الوله زاااد حَبّه
جيت اكتبه ، جاني ( خبر عاجل ) وضاع

ردّوا لي احساسي .. وياقلب خَبّه
محدٍ إذا فات العمر يملك ذراع

الله حسيب الطين واللي لعب به
لامن غدا قاسي وهو طين فِ القاع

والله يجازي كل من كان سِبّه
في وقت خلّوا به جثث ناسه ايقاع !