وتنكسر نبتة .. - عبدالله الملحم
أجيه وتنكسر لا جيت نبتة
واغيب وتنبت الأزهار خلفي
واحن وكل ما حنّيت لمته
واصوم افراق كفّارة لعطفي !
أكون العاشق اللي عاف بخته
ولا عاشق وعنه الحظ يقفي
ولو لي قلب يتحمّل حملته
ولكن وين قلبي ووين كتفي ؟
أنا ماني بحاجة بعض وقته
أنا محتاج بعضه وقت نزفي
تمنّيته يشوف شلون شفته
وكيف لْوصله اتحدّيت ظرفي
أو انه ما خسرني لو خسرته
ويكون أصدق من (احساسي) و (حلفي)
أو انّي مثْل من مرّوا بصمته
أنا مرّيت في صوته بعزفي !
هجرته ، وان رضا يكفي هجرته
واذا عوّد ، فما لي دمع يكفي
بجيه وتنبت الْيا جيت نبتة
والى من غبت فالازهار خلفي