أنا العادي ! - عبدالله الملحم
أنا مانيب عبدالله بدونك
ولاني حُر إلاّ في سجونك ..!
(أنا العادي) مثل غيري .. ولكن
أصير (المعجزة) لو جيت كونك
أيَا شعرٍ عجزت انّي أقوله
تمشّي في شرايني بهونك
وعيشي وسْط خفّاقي أميرة
وشيلي وحطّي اللي يعجبونك
تَخَاصَم كلّ أعضائي عشانك
يبونك .. ويش بيديني .. يبونك !!
خَذَيتي امْن الزهر أحلى خصاله
أبَد .. هو من خَذَا عطرك ولونك
ولوّ الرّيح تدري فيك هبّت
على دربي ، لجل تسرق دخونك
أحبّك حلْم قاصي .. وان وصلتك
أحبّك حلْم ثاني .. لَجل اصونك
كذا حالي وانا مجنون عاشق
أموت احيا .. إثارات لشجونك
واذا تهتي وإنتي في ضلوعي
وَعَدْنا هو وَعَدْنا .. في جفونك
تَحَسْبيني إذا حبّيت (واحد)؟
أنا الـ (واجد) من اللي يعشقونك
ولو هو خانني تعبير قلبي
أفكّر كيف (تعبيري يخونك)؟
سؤال .. وما أبي منْك الإجابة:
وش الأحلى عيونك أو عيونك؟
وش الأجمل جمالك أو جمالك؟
وش الدنيا بلا قمّة جنونك
وانا مانيب انا والله بدونك
ولاني حُر .. إلاّ في سجونك !!