مَغفِرة
في مكانٍ ما نسيت ابْه الهويّة
أحلف انّي ساكنٍ داخل عيونك

واذكر انّي صدق ما أملك قضيّة
غير انا .. منهو أنا لو ما أصونك ؟

ومن يكون اللي نوى فيك الأذيّة
غير شربة ما .. شربتيها بهونك

إنتي للدنيا من الخالق هدّية
مغفرة ، والخلق دايم يقصدونك

وانتي اطهر من كُتِب فيها وصيّة
واعذب امْن اعذب سلامٍ في سكونك

فوووق يا أرض الحرم حرّة أبيّة
رددي (الله واكبر) يا فنونك

فِالسما أرضك .. وفيك الروح حيّة
والعمر شعرة تحت غاية جفونك

وان نواك اهل الردى .. ماْنتي رديّة
في طهر (مريم) مَثَل .. ما يلحقونك

وان وفا لك هالملا .. باقي شويّة
لا كثير .. انتي من يوفّي ديونك

في زمان الشوك جيتي مُخمليّة
كم عطيتي وان عطوا ما يآصلونك

دام (ابو متعب) معك يا حي حيّه
لا يهمّك وانتشي من بين كونك

والبسي فرحة عروسٍ سرمديّة
لبسة العز الكرم .. والمجد لونك

مانبي نلعب سوى ع السامريّة
وغير (آل سعود) لا ما يحكمونك

(وسارعي للمجد والعليا) .. تحية
للمليك اللي يشرّفْك ويصونك