ضَرَب وجهه على كفّي !! - عبدالله الملحم
ضَرَب وجهه على كفّي .. وقال : ( الله ما أقساك )
أنا شآقول لامن شفت اثر وجهه على كفّي ؟؟
أناظر ماني مصدّق .. كأنّي صيد وسْط اشباك
غصب اخضع لصيّادٍ أبد والله ما يعفي
سقيت الورد بيديني .. حرست السّور والشبّاك
وهو دايم يعاونّي / يجي / ويوقّف بصفّي
وفالآخر حرق زرعي / وهَدّ السور / ( والأشواك
نثرها في ظلام الدرب ) .. غريرٍ ناويٍ حتفي
تألّم خاطري منّه .. وربٍ خالق الأفلاك
أنا مابيه يتألّم إلى من طاح من طرفي
ولكن ضَرّ في نفسه .. غدر فيني بلا إرباك
وطال بوجهه ايديني سفيرة حسّي وعطفي
وفيني سابقٍ خيره كفاية قال : ( ما أنساك )
وهذا اللي أنا ابغاه .. ( وما أنساك ) ماتكفي
ضرب وجهه على كفّي .. وقال : ( الله ما أقساك )
أنا قاسي إلى منّه ضرب وجهه على كفّي ؟؟