وجع مسعور - عبدالله بن سعيد الحارثي
الصبر وين الصبر يا مشهور
الصبر طال وقصرت اماله
للأرض أرض وللشعور شعور
غربة وطن وشعور قتالة
وهم يناحلني كما الدبور
لا شق صمت النخل وظلاله
يلسع ضميري لسعة الباكور
ويحدني للباب واقفاله
يابو فهد والدور نفس الدور
والحول نفس الحول واحواله
تمر قافلة الليال دهور
والناس تتغير وانا داله
أزعل واخاصم وانفعل وآثور
واشيل هم الغير واكتاله
وانا لك الله موطني مهجور
تتزاحم الغربان باطلاله
احيا معك واحسني مقبور
واموت وانا حي يرثى له
واحس في صدري وجع مسعور
ينهش دفا عظمي ويغتاله
يشدني لأرض يباب وبور
لكن فال الله ولا فاله
ياليت ماللحلم سقف وسور
ولا وطن وحدود ختالة
يمديني اسبح في فجاج النور
وانفض رماد الهم واغلاله
يابحر ياللي تنقل البابور
الخبت ضاق بعجة رماله
تظلم شبابيك القرى والدور
غنت من الاحزان زومالة
والوقت يمشي والزمان يدور
وقلوبنا للطيش ميالة
وش لون اباصبر والعروق تفور
مثل القبس لا فارت ادلاله
من وين ابلقى صبر يا مشهور
الصبر مات وموته اشوا له