القلوب الخشب - عبدالله بن سعيد الحارثي
رغم التعب يا محمد ما ذكرت التعب
رغم القساوة بخير وما عليه خلاف
فقير والشعر في صدري مناجم ذهب
حزين لكني اضحك في عيون الجفاف
كنت انتظر من عيون الحلم رعشة هدب
وافرش رمال السهر والبس همومي لحاف
لكن الاحلام تبخل .. والعتب والعتب
ما طمّن الروح من ضرب الهموم الصلاف
القلب جمرة ويقدح في حشاي اللهب
والبحر بيني وبين اقدار ملحه ضفاف
والدهر ما قدّر اصحاب الحسب والنسب
ولا قدّر اهل العنا .. والمعدمين الضعاف
في جعبة الليل يالوسمي ملامح شغب
واطلال من قرية الذكرى وبعض اختلاف
نقيق ضفدع .. وصرّارة .. وسكر قصب
من فم نورة .. ولمحة من ظفاير عفاف
ايام ترعد وتبرق في عيوني صخب
(صرخة) من الحزن مدري (زغردة )من زفاف
واحلام تولد سمان من اللحم والعصب
وتموت فالبال يالوسمي وتدفن عجاف
من صفر الاشواك ما تنبت غصون العنب
والصخر ما يزروعونه بالورود الرهاف
وانا خسرت المودة فالقلوب الخشب
خسرتها .. بس ما يعني نهاية مطاف
اسج واضحك ولو كان الضحك من عجب
والج في غبة الظلمى بصوتي واخاف
واشب فاقصى تراب الخبت شك وحطب
عشان ادفّي يقين البارحة والشغاف
واقول للغايبين اللي ملوني تعب :
انا بنعمة وخير وما عليه خلاف
لا مرت اشكالكم بالي .. وطاح النصب
صيّحت في مسمع الفرقى .. وقلت : الكفاف