صوت المنافي - عبدالله بن سعيد الحارثي
بس .. يا ظلّ(ن) تساورني شكوك وما عرفتك
جيتني من زورق العتمة ومن صوت المنافي
جيت مثل الدم تسري في عروقي واكتنفتك
قلت ازفك في ظلال اسمي واعطرك السوافي
واكتشفتك .. كيف .؟ مدري ..! بس يا ظل اكتشفتك
ثم هذبتك .. ورتبتك .. وصرت من اكتشافي
وابتديت احيا بحب اسمك ورسمك يوم شفتك
مثل ما شفت السنا .. والبرق والحلم الخرافي
واحترفت الصمت والتفكير لاجلك واحترفتك
لين .. مليت احتراف الصمت واشعلت انحرافي
انحرافي كان ضد الهدم يعني .. لو وصفتك
منحرف ضد البنا .. ياظل .. يعني باختلافي
انت منهو ؟ كيف جيت ؟ وكيف عديتك وطفتك ؟
كيف ابرر للسنين .. اني عجزت ادرك مطافي
رغم جهلي بك .. وكرهي لك .. ورغم اني جرفتك
الا انك لا تزال تمر في بال القوافي ..
شد .. وارحل .. لا يبلغك القصيد اني نسفتك
مثل ما تنسف رياح الغرب .. ديدان المرافي
وان صدفتك .. صد عني واعتبرني ما صدفتك
واعتبر دربك لضى .. واشواك .. والتفكير حافي
ليت لي فكّة من المنفى .. وهجر الناس .. وافتك
كان ما شفت الوجع ياظل يستعمر .. شغافي
باختصار .. ان صرت لي منبر وانا المتعب وقفتك
خذ كلام .. وعلّق الكلمة سما والهرج وافي :
انصرافي والحضور يشد قلبي من عرفتك
وانتهيت وصرت ما تسوى حضوري وانصرافي
اعترف لك .. مثل ما للناس يا ظل اعترفتك
وانت سجل .. لا بغيت تسجل اسمي واعترافي :
انت ذنب .. ولهفتي فاجر .. وانا جيت اقترفتك
" معصية " وابليس هربها من انفاق المنافي