الشوق ما يطري على بال - عبدالله بن سعيد الحارثي
يا عذبتي في غيابك تعتريني ضيقة الحال
ردي علي الضيا واعطيني المجد وصهيله
اشتقت لاحلى الليالي شوق ما يطري على بال
واشتقت يا عذبتي لعيونك السود الكحيلة
يا ما على حنجرتك الدافية علقت الامال
واهديت عطرك وهمساتك للاضلاع النحيلة
واشتقت للضحكة اللي صبت من الحلم شلال
والمبسم اللي يشب البرق من سدر المخيلة
تعالي ابغى استريح بظلك الممدود واختال
تعبت واتعبني الركض الطويل بلا وسيلة
تعالي ابغى عيونك معطفي وذراعك الشال
ترجف عظامي من البرد العنيد ومن صليلة
البارحة كنت افكر واعزف التفكير موال
وابكي رماد الليالي والمسافات الطويلة
من يختصرني لوصلك من يبشرني بالامال
من يطفي الشوق في صدري ومن يبرد غليلة
قضيت الايام لاجل اعيونك الحلوين رحال
بين الورق والمحابر والطروق المستحيلة
ولمست في بعدك الدرب الطويل امن اشهب اللال
واخضر عود البلح في بيدر الشعر ونخيلة
ذكراك في داخلي جلسة غريب ونار ودلال
وشعاع قمرا وجمرة شوق احر من الفتيلة
لي في عيونك سهاد وفي هدبك الظل مقيال
لكن ما اسرفت في فية هدبك وفي مقيلة
وشلون اشوفك واكيد العاذل الكذاب واحتال
وانا نفد صبري الطيب ولا فاليد حيلة
عليك مني سلام وحب يا دلوعة البال
ما رف رمشك وما ذاب الزهر فوق الخميلة
اتذكريني ليا هب النسيم وحرّك الجال
واختل وجه القمر في ماه واطلق به سبيله