امتداد اليم - عبدالله بن سعيد الحارثي
لا الحزن حزني , ولا هالكاس كاسي
ليت من يحبس قلق عمري .. يريقه
كيف اطيق الصمت .. هذا الصمت قاسي
كيف اسولف .. كيف افكر فالحقيقة
جيت احدث للسهر وانفض نعاسي
عن جفاف الحلم والورد ورحيقة
جيت ارتب فوضيات انعكاسي
جيت ارتل صرخة العمر العتيقة
وحدي اعطي .. وحدي اتحمل واقاسي
وحدي المحبوس .. وابياتي طليقة
وحدي اللي ضعت من كثر احتراسي
لا يطيح الريش فالقاع السحيقة
وحدي اللي صرت حمال المآسي
مو طريقة .. ظلم .. هذي مو طريقة
ما تطيق اليم نفسي .. و المراسي
وامتداد اليم نفسي ما تطيقه
الأمل يكبر ويصغر عن مقاسي
وان غفيت .. الحلم يصفعني بريقه
صرت ناسي .. ليه انا ما اصير ناسي ؟
والطرق ضجة .. وكل في طريقة
ودي امطر لين افضفض عن يباسي
واختلي بالنفس وعيوني غريقة
لين ينبت في مدى عمري حماسي
واكمل الباقي بلا نفس زهيقه
ودي اصبر لا انكسر فالعمر فاسي
علها تنبت على الصخر الحديقة
لو يقولون الزمن لعبة كراسي
قلت كم لعبة كراسي فالدقيقة
سامح الله من جمع فالعمر ياسي
وسامح الله من ترك فالقلب ضيقه
كاسهم والحزن مو حزني وكاسي
حملوا نفسي بمحملٍ ما تطيقه