رغوة الشمس - عبدالله بن سعيد الحارثي

وجه التراب اللي شرب رغوة الشمس
غير تقاسيمه صهيل الغمامه

كان الامل بذره وكان الرجا دمس
وكان التعب فلاح يلبس عمامه

وكنت اهتني بالورد في حضرة اللمس
وكنت اعتني بالبرد واركب سنامه

واليوم هاجم صفحتي مخلب الطمس
وتناثرت منها فروخ الحمامه

جاني من الذكرى على مجريات امس
يزرع تفاصيل الشقا في عظامه

جاني وانا احفر في رماد الحشا رمس
للمجد وظنون الترف وانهزامه

قلبه على نبض الوله منحمس حمس
ودمعه يسابق فالمحاجر كلامه

قال: انتظر ,, قلت: العفو خاطري عمس
والله يشتت شملنا بالسلامه

واللي خلق دنياك وفروضك الخمس
ارحل وخل الليل يطرح ظلامه

خلك بعيد ويكفي نعيش في همس
انته وانا مانلتقي والملامه

مثل القمر لويحتري رجعة الشمس
يمكن من الرجعه تقوم القيامه