البارحة - عبدالله بن نايف الرويس
البارحة جفني عن النوم مذهول
طيب المنام ولذته ماحصللي
اليا شتل عيني عن النوم شاتول
أخذت مع هاجوس قلبي تسلّي
وليا عذل عيني عن السهر عاذول
قلت السهر ياعاذلي جايزنلّي
مادام الي قلباً من الحب مدهول
ما اشوف في كثر العذل صالحنلي
اتركني اتبع راحت البال واقول
من ماتصور واحضره هاجسنلّي
خل القلم يكتب من القيل معسول
ابيع واشري فيه واخذ وخلّي
اخذ من اول صفوة الجيل مزلول
واترك حثال الجيل عنّي يولّي
عسى يعالج خاطراً فيه نشبول
من ضيقته ضاق الفضا والمحلّي
كان العزيز يصيح للحب مذلول
فانا الذليل ولاحداً ذلّ ذلّي
دايم وجيبي بزرق الدمع مبلول
وحالي نحيلاً من الهوى مستخلّي
حالاً براه الهجر حولاً ورى حول
ياللي يتوق لهجرالاحباب حلّي
طفلاً طغى ماله بسوق الهوى دول
بحلى صفات المحصنات متحلّي
راعي هدب عيناً بلا كحل مكحول
والبدر كنّه في الجبين متجلّي
ما احرزت اجيه ولايجي منه مرسول
بيني وبينه واحداً واقفنلي
عليه قلبي بين الاظلاع متلول
ودايم وهو للبال قبلة مصلّي