أصحاب السمو و الجلالة - عبدالله ذويبان
يالله عليك الستر في كل الاحوال
يا ذو الجلال اللي تبارك جلاله
بأسمك لنا مبدا و مبنا و مدخال
و أثبات حق و رد كيد و مقاله
للشعر فتل و نقض و أسلوب و أقفال
و أتقان و أسترسال فكره و حاله
ما دونه الا الموت و جباله جبال
و القافيه و الوزن ماهي جباله
القافيه و الوزن ذي لعبة أطفال
سلّم و يطلع كل فاشل خلاله
و الشعر انا عمه و شيخه و اذا قال
لبيك طعته كني أصغر عياله
أقول فيه أشياء ماهيب تنقال
و أنال منه أحيان و أحيان أناله
لا ورث جد و لا عطية ولد خال
و لا دعوة أم و لا تباشير خاله
لا و الله الا مرّ و أنساق فنجال
محد شربه و صار هو لي و انا له
فأما كتبت و قيل ( ما ينعطى بال )
و الا كتبت و قيل ( رمز الجزاله )
جعل الله يبارك بعبده و ما شال
و يغنيه عن ترك الحرام بحلاله
يوم القصيد اليوم و الوادي أن سال
قام يتصافق فيه جاله و جاله
يا ليتها بالفعل و أنطح لي ارجال
مير البلا قدام عيني حثاله
مراهقين صغار مجموعة عيال
عصبة ضحايا المجتمع و البطاله
من حكمة الله فيهم الشخص يختال
منحل فكر و يفتخر بأنحلاله
مثل البهايم لا عقيده و لا أشكال
جاهل يروح و جاك جاهل بداله
عز الله ان يبطون ذره و مثقال
ما يلحقون مطير عرق و سلاله
من عادة ذياب الصحاري و الادغال
يوم اللقاء ما تلتفت للثعاله
هذا و انا لا قلت ( حنا ) لنا مال
غصن الزمان و زاد رقعة ظلاله
حنا لنا التاريخ و كبار الأفعال
حنا طريق الطيب حنا مجاله
حنا سرايا الموت و جموع الأبطال
روس الرجال أهل الظفر و الشكاله
فينا و عنا يُكتب المدح و يقال
و المجد حنا قمته و اكتماله
فالحرب حنا خير مضرب للامثال
و فالسلم حنا خير من ينسعى له
عز الرفيق و ستر منسوفة الشال
و أخوان ضيق و ما ندور جماله
بيض الوجيه الغيم سمحين الأقبال
الشامخين مطورين الأصاله
لمطير كان المجد شاهد و لا زال
يوم النهار غبار و الحرب أزاله
زلنا الدول و عروش أهلها و الأجيال
بمصادم الجمعين ماهي سهاله
فأن عذربونا ما على الشمس غربال
للمستحيل الله جعلنا أستحاله
و ان كان طيب الراس من طبع الأنذال
يا ليت بعض الروس فيها ( نذاله )