100 تكبيرة - عبدالله ذويبان
العبد لله و الهوى بيد الله
سبحانه القادر على تدبيره
اللي كشف دق الكتوم و جله
و اسبل على كل العباد بخيره
أجنح الى درب الهدى و أدله
و أنحت على صخر الزمان و جيره
لا عاش رجلً ما عرف له مله
و لا عاش قناصً تبدل طيره
ياصاحبي و ان جيت قلبي قله
تراك باني فالمحاني ديره
شوارع و ملك و قصور و فله
و القصر قصرك و أسكنه يا أميره
فداك كل اللي ملكته كله
شعري و ما تملك يديٌ و غيره
حبك على قلبي نزل و أحتله
خذاه كله (دونما) تسعيره
نشر خفوقي للهبوب و فله
و خلاه تلعب به هبوب الحيره
غافل مواكب زحمته و أنسله
و أقفا يقوٌد فالضلوع بعيره
و عطل شعوري فالغرام و شله
و أضحت صغيرات الجروح كبيره
كنه يقول ان الغياب أحسن له
أبيه يتبع خطوتي في سيره
لو أن قلبي ينوضع في سله
لأهديه من ورد الهوى نويره
روحي و هي روحي تجي منتله
لا جابوا أسمك و الحياة قصيره
صبيت لك دم العروق بدله
و أزيد لك فنجالها تبهيره
أخاف لامني بغيت أتله
يضيع مني و العروق كثيره
ثلاث منك سببت لي عله
جمال حرفك رقته (تقصيره)
و
و (بريه) ما تزعل على (عبدآلله)
الا بوصل ارحام و الا جيره!!
بعض العقول المظلمه منحله
و العقل عندي ميزته تفكيره
حلمي بجنبك ما قدرت أوصل له
لانه كبير و مقصدك تصغيره
أدري كفر من شعب قلبك ثله
و أعلن خفوقي للقضاء تكفيره
و الشيخ لا حس بزمانه زله
كبر على الزله مية تكبيره
الله و أكبر و الهوى بيد الله
سبحانه القادر على تدبيره