صقرالعروبة - عبدالله عبيان
سجدنا لربٍ ساق برق السحاب إعصير
على ديرةٍ فاح النفل مع هبايبها
من العارض المنقاد بشّر بشير الخير
ونجران هلت به وفلت ذوايبها
هلا والقلوب اطهرمن الغيم والتعبير
وبيض النوايا في الحنايا نرتبها
هلا بك يا نبراس العدل قايد التطوير
ياصقر العروبه يا اصدق الناس واطيبها
هلا مرحبا والحب ما يحتمل تفسير
وليالي غيابك يا ملكنا نحسّبها
كسيت الجبل بشت ووقف هيبه وتقدير
يقلّد شموخك والثريّا يراقبها
وقمة طويق اللي عليها يغني الطير
زهت بالعقال تميله فوق حاجبها
تسوي سواتك وانت طبعك وعزمك غير
وعطفك يابو متعب رفع قدر شايبها
بكيت وبكا شعبك من طريف لل خرخير
على ابن الشهيد ارهت عيونك سحايبها
دموعٍ تهزم الذل وتحارب التدمير
دموعٍ تسولف للوطن مجد غايبها
دموعٍ تداوي الجرح وتكافح التزوير
دموعٍ تصب الشمس والليل يشربها
دموعٍ اشد من الجنابي وسيف الزير
على الشلة اللي ماجهلنا مآربها
تجي يابكور الوسم بالغيث والتبشير
تزف الحيا وبروق ليلك تجاذبها
تبادر بفعل الخير والجود والتيسير
وتشهد على طيب المواني مراكبها
وعضيدك ولي العهد ماحافه التقصير
حزامك يمينك درع جنبك مقطبها
يقود الطلايع سرب وقّّع وسرب يغير
وكفٍ تمد الشر للدار يعطبها
خذ العهد منا يا ملك يا وطن يامير
يارملٍ سكن عوج الضلوع ومناكبها
نعاهد على طاعة ملكنا بلا تأخير
نعاهد نقدم روحنا له ونجلبها
ودارٍ تشفر حبها في الحشا تشفير
نعاهد على صدق الولا في حرايبها
نعاهد نسوق العمر واللي يصير يصير
مماتٍ يعز ولا حياة تغضّبها
نماري بتاريخٍ يخلي العقول تحير
نجوم السما عنّه تسولف مواكبها
عسى الله يرحم من بنى المجد بالتفكير
سرى والسيوف إلها رجالٍ تخضّبها
هجد نجد في ليل الشتا واعلن التغيير
وشامت لبو تركي ووحّد جوانبها
رحل والمواقف خالده ما تبي تذكير
رحل والبيارق في ثرى العز ناصبها
وخلّف صناديدٍ بنهج الكتاب تسير
على العز والنوماس رفت شواربها
ليا صاح حدك ياوطن واعلنوا التحذير
تعزووا هل العوجا وداسوا صعايبها
يغني الخفوق ولو سألته عن التبرير
يقول انت يا صقر العروبة سبايبها
يرحب بك اللي ما عرف وجهه التكشير
اميرٍٍ يسوق الخير والناس كاسبها
شلع في الوديعة واعتلى والشرار يطير
وشهر مشعل بن سعود في الجو واعجبها
هلا بك يرددها هلا والديار بخير
وجيّتك ياغيث الربيع نترقبها
الا ما حلا شوف العشاير تحث السير
شمال ابرق الفنجال والعشب جاذبها
فجوجٍ تفوق الوصف والشرح والتصوير
مواكر شياهينٍٍ حدادٍ مخالبها
رجالٍ على حد الوطن تحتمي وتغير
تحت بيرق آل سعود تسري ركايبها
على البر والتقوى يميحون جم البير
وتواضع مقامك يا ملكنا يقرّبها
خشعت ورفعت ايديك بالحمد والتكبير
بركن الحرم ودموع عينيك تسكبها
تهلل وسبّابتك يا اطهر مليك تشير
لربك عسى ربك يحقق مطالبها
وتبقى بلدنا موطن الدين والتنوير
ووجهك يابو متعب ينوّر ويطربها