الضال - عبدالله عطية الحارثي
مسافر والجسد هو مركب الروح الدليل الضال
عجز يقرا تفاصيل الدروب ورحلة سنينه
مسافر وين...؟ مدري وين تاخذني رداة الحال
تعبت ارسم على كفي وطن اجهل عناوينه
تعبت ازف طعنات الظنون لعمري المنهال
واعري في اشتعال الريح غصن ايامي وتينه
انا ذاك الغريب اللي خرج من شهوة الترحال
انا الحر السجين اللي يبيع القيد ليدينه
انا اللي كل ماابني صرح لاحلام العمر ينهال
يموت الحلم في درب اغترابي قبل تكوينه
على جمر النوايا والجفا جفت غصون البال
وطارت من عيون الليل عصفورة بساتينه
سقيت الحزن من دلو اغترابي والسنين حبال
وعتمة دربي المجهول تستنبت شياطينه
تناثر عمري الفاني مثل حفنة رماد اطلال
تلاعبها على كف الزمن فوضى خماسينه
منين ابدا نهايات الرحيل الموجع القتال..
منين القى لهذا العمر غيمة تحتظن طينه
وانا المسجون في هداية رحيلي والوجود الضال
وروح تسكن يدين الضياع وغربة سنينه