مش هيك بتكون ! - عبدالله عطية الحارثي
طار الورق صاروا محبينك اغراب
ماعاد لاعشاشك عصافير .. وغصون
واحساسك اللي في اشتعال السهر ذاب
كانت ( شوارد) تشربه عشب .. ومزون
وكنت السنابل .. والاسامي ..والاصحاب
وكنت الجنون العاقل اف عقل مجنون
وعطر الرسايل .. وارتعاشات الاهداب
وهمس الهديل اف شرفة اللي يحبون
تزرع بيادر وحدتك ناس.. واحباب
وتقطف بوادر طيبتك جمر.. وطعون
في غيبتك تنعس شبابيك .. وابواب
ويموت شمع بسيرة العشق مفتون
وفي ( صلح ) امل دنقل ( واناشيد ) سياب
يسكنك هم.. وكنت بالهم مسكون
قلت اكتبك قبل العناوين تنساب
وقبل المدينه تسكنك قلب .. وعيون
صالح .. وينبت ضحك .. واطفال .. والعاب
وطيش وغنا فيروز.. ( مش هيك بتكون)
صالح .. ويتشجر ورق توت .. واعناب
ويلذ في غصن الحكايات ليمون
صالح.. وتتصالح مسافات .. وتراب
واغراب في محراب نزفك يصلون
قلت اكتبك صار الورق عطر وثياب
والروح ترقص عاريه في دفا اللون
وصار القلم عصفور .. وكفوفي اعشاب
واصابعي طارت فراشات في الكون
وتسنبلت في غيمة الحرف الاسباب
واثمر على بال الورق غصن زيتون
قلت اكتبك لاصاروا احبابك اغراب
وطارت من ايامك عصافير .. وغصون