تبت يديه - عبدالله عطية الزهراني
ارفضه واعشقه واعصاه وانصاع له
وازبنه واشتكي له ِمنه وابكي عليه
اقطعه ثم ايمّم صوبه الراحلة
كلما غبت يجبرني شعوري واجيه
لو نزعت الغلا من داخلي بأكمله
كان ماجيته ابكي واشتكي وارتجيه
جيت ادوّر لنفسي ياملا داخله
بس عجزت ألتقي بي فيه تبت يديه
قمت اعدّد ضلوعه شفتها كامله
يعني الحب ما طبَه ولا يحتويه
كنت انا احسب عظامه واهنه ناحلة
لأني احسب معاناة الهوى تعتريه
لعنبو قلبه اللي مايعرف الوله
عبرتي ما تحرك نبض الاحساس فيه
والهوى ماعرف دربه ولا واصله
ورغم هذا احبه ثم احبه وابيه
لو حمل بعض حبي ناء به كاهله
لو نثر بعض دمعي تحترق وجنتيه
كنّ قلبي بعير ن تتبعه قافله
وين ماسار سارت وان وقف تحتريه
وان تعثّر بسبة خطوة ن غافلة
وانحنى,مال يطلب عون بيض الوجيه
كم محب ن تعثّر وألتوى كاحله
وانكسر في هواه وكان قصده نزيه
وكم كسول ن غشيم خطوته خامله
نام ليله وحظّه جاب ما يشتهيه
السعادة كما ريم الفلا جافلة
تشرد ان حد بغاها وان تركها تجيه
عكسنا عكسنا وأيامنا الافلة
تهدي اوجاع واما الفرح بدري عليه