قصيدة لاتعبر عن نفسها - عبدالمجيد الزهراني

قالت من انت وقلت ( مجموعة اكفان )
من كل فقر وجوع تلقين فيني!

حريتي في يد نافذ وسجان
بس الأكيد اني باحرر يديني

سجان سكرانٍ , ومسجون سكران
بالخمر هو سكران وانا بطيني

الله خلقني طير ومعاي جنحان
والله خلقه يقص في ريشتيني

حفيان , بس الارض رجلين حفيان
واللي سجني , مابيسجن يقيني

بكرة تطيح سجون , وتطيح جدران
وتشقق الظلما بداية جبيني

وإلين بكرة , فاير الدم سهران
بكرة , وبكرة قربت صدقيني!