أزارير الحكي - عبدالمحسن بن سعيد

لا تكتبيني غيم تمسحني الريح
ولاترسميني مركب انسى الشواطي

يامن هدب عينك لقلبي مراجيح
وأفرش تحتها عن جبينك بساطي

أمشي وانا اللي لو تعثرتي اطيح
وهي لك حروفي بس خلي نقاطي

ياكثر بيباني وقل المفاتيح
ولانيب حتى لو أبي البعد ساطي

وينك تعبت اسأل عن النرجس الشيح
وينك تعلّت قاع والسقف واطي

فكي ازارير الحكي ودي اصيح
لاشك أخاف يشق صوتي خياطي

يادمعتين الثلج يوم ابتدا يسيح
جيت اجلدك وادمت كتوفي سياطي

وان قلت احبك واجمل الحب تلميح
مافك سجان المحبه رباطي

كذا كذا نامت عيون المجاريح
كذا ابتدابك يالجروح ارتباطي

ولاتكتبيني غيم تشربني الريح
ولاترسميني مركب اظما شواطي