بلونة الأرض - عبدالمحسن بن سعيد

حبيبي والشعر نورس حبيبي والحلا طاووس
وأنا شاعر( كذا) مجنون في رسمك وتلوينك

تعال أفجر معي بلونة الأرض بطرف دبوس
تعال وجرّب هبالي وشم الورده بعينك

تلمّس بأصبعك شفّة وجع صمتي وحسها حوس
تشوّف لأكبر أسراري وتلّه تل بيدينك

تعال أقلب موازين الحياه وغير القاموس
تعال أكتم نفس كل القوانين بقوانينك

تحرّك شف (قزح) ليتك تفكه من عذاب القوس
تصرّف وأنت أعرفك ماتبي توجيه من حينك

تقدم خطوتين ودس على حدب الحنايا دوس
تراجع لا ولا خطوه : تزور القلب سكينك

طلبتك علّم أجواز الكناري كل فنّ البوس
وأمانه تشرح لقطن السحايب مسألة لينك

كذا وإن دارت الدنيا علي وإلا الهوى جا (كوس)
(معّطت) من المسا قذله وغنيت لفساتينك

حبيبي لا تصدق من يقول ان الغلا محسوس
غلا ً ماتقضبه يمناك خلّه تحت رجلينك

وأنا من خانوا أحبابي عرفت ان الحياه دروس
ولكن للأسف مازلت جاهل (بينك وبينك)

حبيبي لا تعدّ لها كذا هي صورة الفانوس
حبيبي لاتموق؟ (الشعر شعري) وانت لك زينك

حبيبي وإن بكا النورس تأكد خانه الطاووس
وأنا شاعر ذكر جرح ونسا رسمك وتلوينك