ثمانين رجّال - عقاب الربع
ماهو رجل هذا ثمانين رجّال
تبي الرجوله شوف هذا الرجوله
حكيه ليا منّه حكى مضرب امثال
وصمته كلام ٍ ماقدرنا نقوله
لاقام تقهر وقفته كل الأجيال
وليا جلس راس الجبل مايطوله
مدهال طيب وبالشعر خير مدهال
شكّل من حروفه للابداع دوله
اعطى السحاب وعقبه الغيث همّال
اغرى الهطول وجاد فينا هطوله
نقش على خد السما وجهه آمال
يوم ابتسم صار الفضاء وشموله
غرس كفوفه بالثرى قامت جبال
فتّح عيونه حصّل الغيم حوله
ذا راعي العليا به الشعر يختال
كل القصايد في حضوره خجوله
هذا عقاب وجرّ يالمدح موّال
واعزف على لحن الغلا مااقوله
بياض قلبه كنّه أحلام الأطفال
وأطفال حلمه حلمهم بالبطوله
ابختصر في وصفي ل طيب الفال
في بيت واحد واسمعوا هالمقوله:
كنّه بساعة ماانولد اقسم وقال
والله لااطول الشمس والله لااطوله