مكالمه بايخه - عقاب الربع
بعد شهرين من وفاة إبن الشاعر إتصل عليه دكتور من مستشفى ليدعو إبنه حيث جاء وقت الموعد
وهذا ماقاله / عقاب الربع معبرا عن معاناته بفقد ابنه بسبب سوء المرافق الطبية
ألو مرحب هلاوالله تفضل معك انا اهلين
أخوي ابغى ولي امر يوسف عقاب انا الدكتور
تنهدت ودريت انه مولم طعنة السكين
وانا من دون سكينه ياكم سكين بي مكسور
نعم آمر يادكتور وتلفض لي : (بعد يومين)
تجي معك الطفل يوسف ولاتفوّت عليه الدور
سكت وقلت يادكْتْوْر انا ويني ويوسف وين
يادكتور وينكم عنّه وانااصرخ لي ثلاث شهور
تجاهلتوه ياابن الـ... طنشتوه يالوسخين
علشانه شمالي أوعلشانه مو ولد هامور؟
حبيبي ماات يادكتور قدامي قبل شهرين
قبل شهرين كفنته انا ف ( يديني ) يادكتور
زهق من (مجزرة رفحاء) وغذايه وخبث ايدين
وتعب من( اجهزة عرعر) ومستشفى كل ابوه قصور
نخاكم بس يبي منكم سرير ينام فيه شوين
وكسرتوا خاطرالطفل وغدا من خبثكم مخطور
تكاثرتوا على يوسف ( هوا الله ) ليه ياشينين
كأنه من كثرغبنه بكم وادع وهو مقهور
حرام إنتم بشر واذا بشر فانتم من الضالين
بلا رحمه بلا دم وضميرٍ فاسدٍ مقبور
يابيخك حيل بايخ يااستشاري المسخره والبين
ف برودة دم تبغاه يحضر؟ من وين؟ من هالقبور
قبل مده وقفت وشافوا وقوفي هكالغالين
رجعت ولا معي يوسف وعّمر هالحزن بصدور
رجعت لبيتنا ضايق حزين ولا دمعت لي عين
لأني لو بكيت امه تموت وجيتها مسرور
واقول اليوم لاتبكين غيره نُرزق بعشرين
ويُملا البيت يا ( أم يوسف ) وانا في داخلي مذعور
الى هالحين ماسكرّت؟؟ علامك ؟ وش تبي هالحين
عطاك العمر يادْكْتُوُرْ ولا قصّرت به مشكور
يابايخ ضف وجهك ولا ابغى تتصل بعدين
حبيبي مات من شهرين فمان الله يادكتور