حُبة خشم - عقاب الربع

يارب انا عبدك رفعت ايدي خشيه فالقنوت
اغفر ذنوبي والذنوب كثار ودروبي دشم

اعوذ بك من هرجة اللي لاهرج من غير صوت
طبيعةٍ مايتوب راعيها يلو يرشم رشم ‍

يالورع ياللي جامع كنوز الصحاري واليخوت
ياردي ماعمر الردى عز الرجاجيل وحشم

ماتنفعك خلطات ابن سينا ومي العنزروت
لو تهشم بمخطر مكاويّك معاليقك هشم

وش عاد لو كثرت مصاريّك ووسعت البيوت
يموت جيعانك يناظر فيك يامال البشم

ليا صار مالك فرسة الجربا ولا طيب محروت
وش لك بغصب الطايله وانت فبطينك منهشم

يومك تفت الليل بالدولار وسط الماريوت
حنا نفك المعضله لا جات من حبة خشم

مهبلٍ والموت فرصه مانخليها تفوف
ليا طوحت بالصوت من يزهى مبيسمها الوشم

طولاتنا مترسخه ياخويط بيت العنكبوت‍
يشمها الذيب يعوي ثم يعوي ثمٍ يشم

تهبا واقصر فحجتك ياشيخ في لعب البلوت
‍وان قال قص ازمره روّح مانقص على غشم

وخل البشوت ام الجيوب الواسعه لاهل البشوت
وموّل بنايك واترك صدور المجالس واحتشم

النعم كايد والسقيطه ماترفعّه الكروت
‍كان العشم والا عسى يالذيخ ماكان العشم

يقوله اللي لا سرى جوه على ليل البيوت
كنه يبي يقطم على دربه ثلاثمية خشم