العطر والمنديل - علي السبعان
على طاري زمان (ابها) زمان العطر والمنديل
تذكرتك وانا والله لوصلك ماني بناسي
تذكرتك ومحتاجك ولكن الزمان بخيل
بخيل و مو بخيل وبس لا والله بعد قاسي
أجل لولا كذا ما يحرم العتمه من القنديل
ولا يجبرني اتغرّب عن دياري وعن ناسي
انا وقتي شرا منّي سنيني المقفيات الحِـيل
وبدّلها بما سوّد مقابيلي وكرّاسي
قصيد ٍ كلّما قلته احسّ انه حكاية جيل
وبعض الناس لا سمْعِه حسَبْني شاعر سياسي
قصيدٍ لا سمعه الغـرّ من شِدّة طربه يْميل
عساه القوم ، متسلطن ، وهو مو فاهم احساسي!!
أنا ما همّني مبسم قصَب سكّر وطرف كْحيل
ولا آبي من حطبهم غير عود ٍ يقطعه فاسي
ولو مالت طوال النخْـل،انا ماني براعي نْخيل
كفاني من بنات الرمل مربوعه على قياسي
بنيت الحلْم من طوب الكلام اللي يقال وقيل
وطاح الحلم من دوني وطاحت دونه انفاسي
أغنّي!! وِلْــ مَن؟وصوت الكناري ما يصحّي الفيل
على العكس اكتشفت اني بديت اراود نعاسي
انا من حقّي ارميهم حجارة شِعْـر من سجّيل
وهم من حقّهم يبنون قبري من حجَر ياسي
خذتهم لعبة التلقين والتسكين والتشكيل
شغلْهم عن ذهب حرفي رنين اخطاي ونحاسي
وانا لوني من اللي يعرفون المسْح والتقبيل
أبد ما طِحْت والاّ بالقليله طِحْت متواسي
ولكن عيبي ، او أكبر عيوبي ، أكره التضليل
ولا استر من عيوبي شيْ سوى ما يستر لباسي
بلاي اني ما احب مْن الشِعِـر ما يسبقه تطبيل
ما احب من الكلام الاّ الثقيل الراكز الراسي
مااحب ابني على ساسٍ تحت ساسه تراب يْهيل
احب ابني على ساس ٍ صليبٍ مثلما ساسي
مااحب من الجمال اللي لَعَـب به مشرط التجميل
ولااحب من الثياب اللي بصدره خاتم الكاسي
مااحب من البنات اللي تجيد الرقص والتمثيل
ولااحب من الضيوف اللي يغثّ قلوب جِلاّسي
اطوّح صافي النيّه بوجه الشك والتأويل
أطوّق جيد الِمْهِمّه كذا،واعلّق أجراسي
خلقت وفي يدي سيف وعلى صوتي نقوش صْهيل
ولكن وش يفيد السيف دام الخصم في راسي؟!!