انتحار الدموع - علي السبعان
لي ألف دمعه تنتحر في غرامِك
وبي ألف جَرْح وكل جرحٍ قصيده
ولك ألف عذرٍ لى نشدتك علامِك
والف ابتسامه والف كذبه جديده
الله يا انتي كم خدعني كلامِك
ما كنت أحَسْبِك يا عنيده عنيده!
لازلت انا اذكر غمزتك وابتسامِك
لى قلت أخاف أرْحَلْ وتبقي وحيده
وفعلاً رحلت وْوَسْط قلبي مقامِك
ما قَلّ لا بالعكس بُعْدِك يزيده
عشت العذاب وْعاشني في خصامِك
ما نمت وانتي عن عيوني بعيده
وانتي عيونك ما هجرها منامِك
وبْرغم دمعاتي, ضحَكْتي سعيده
عيني تلومك يوم رحتي ولامِك
قلبٍ سكنتي في حنايا وريده
والعاشق اللي كان يعشق ظلامِك
نورٍ غديتي مصدره ما يريده
واليوم حتى مايردّ لْسلامِك
لا تهمس شْفاته ولا يرفع ايده
ولا عاد ينثـر دمعته في غرامِك
يكفيه يكتب لا تضايَقْ قصيده