شيخنا محمد - علي السبعان
الله أكبر الله أكبر الله أكبر الله أكبر
دام عز ارض الامارات الحبيبه في تمامه
فرحتين وهَـ البَلَدْ تستاهل أكْثَرْ لو به اكثـر
أقترب عيد الجلوس وقام زايد بالسلامه
ارفعي يا دار زايد راية النصر المظفّر
بيرق ما يرفع الا للكرم واهل الكرامه
رايةٍ فيها النقا الأبيض وفيها الدمّ الاحمر
شافها الكافر هلاك وشافها المسلم سلامه
رايةٍ زايد رفعها فوق فوق النجم الازهر
ما وقف في ظلها مخلوق ما علت مقامه
ارفعيها والله ان اليوم يوم الفرح الاكبر
ما على طرف من الفرحه خسر لذة منامه
في شفا شيخ البلاد وحرّها الشوّام الاشقر
شيخها اللي قد تعلّى المجد من ذروة سنامه
أسْفَرَتْ به وانورت من حقّها تسفر وتِنْوِرْ
بالحبيب اللي تغيب عنها وابطى مقامه
عاد في ثوبٍ من الصحه جديد وزايل الشر
شيخها اللي ما فتنها البشت عنها والعمامه
ريف شايبها الكبير وسِتْر ذات الطَرْف الاحوَر
والد الطفل الصغير وخاله وخيرة عمامه
الزعيم اللي به بْلاد العَرَبْ تزهى وتفخر
ما تعلّى بالزعامه به عَلا راس الزعامه
الحكيم اللي شموس الفكر من هامَتْه تِسْفِر
الصدوق اللي فعول ايديه ما تنقض كلامه
الشجاع اللي ليا رَفّ الشنب تهتزّ الابْحِر
وان رضى وجهه صباح ومدّة ايدينه غمامه
ذاك ابونا.. كلّ ابونا.. من (شِحِرْ) للبحر الاحمر
من ورا دار الصباح إلى (المحرّق) والمنامه
كلّنا منّه وفيه وبه وعَنْه وكيف نَقْصِر
دام أهَلْنا قبل ربّونا على حقّ احترامه
في سلامته انتبارك وانتباشر وانتبشر
في محبة (بوخليفه) ما على حَيٍ ملامه
كل قلبٍ فيه نبض وكل ثغرٍ ردّد ابشر
وكل وجه من وجيه أهْل البَلَدْ فيه ابتسامه
وانبرى الشعار جيشٍ قايده الأوّل والاشهر
شاعرٍ يفخر مجال الشِعر باسمه واهتمامه
شيخنا (محمد) وقوله مثل طيب المسك الاذفر
نقتبس من طيب طيبه لو قصرنا عن مرامه
انتطاول ما يطول وكلما هو طال نقْصِر
ما طلعنا نِيْف شِعْر إلاّ لقينا له علامه
في ذراه ومثل ما عبّر عن احساسه نعبّر
وما نقصّر في وصوله عند أبو راشد تمامه
الفرح حبر القصايد والقلوب البيض دفتر
والهوا داعب نديّ الغصن لين أطْرَبْ حمامه
والعذارى خضّبن حِنّا الفرح في كْفوف مرمر
والنشامى حوربوا وقفاتهم عِزّ وشهامه
والنَخَل قاماتها تنعش جريد السَعْف الاخضر
والبَحَر من فرحته يرخي عن اللولو لثامه
والمداخن بازرق العود النقي قامت تبختر
وابتسم ثغر الإمارات وبدت فيه الوسامه
وارتسم لون الفرح في كل وجهٍ طاهر أسمر
وانحنت سمر الجباه لْمن حمى زايد واقامه
الله أكبر الله أكبر الله أكبر الله أكبر
والف حَمْدِ الله من الخاطر لزايد بالسلامه