عيشي وحيدة ! - علي السبعان
عِيشي وحيده تايهه في مسارك
دُوري على نفسك الينك تموتين
عِيشي بوهم وعشق ذاتك شعارك
خلّيك باوهامك عسى ما تفوقين
خلّي جليدك يصطلي حَرّ نارك
خلّي عيونك حربها بينها بين
خلّي يمينك تحتضنها يسارك
لا امتدت ايدك ما ِلَقت كفّها يمين
وْلا حلّت اللوعه على باب دارك
تخيّلي شوك التعاسه رياحين
عيشي معَ همّك وذلّ انكسارك
لو تِقبلي ما طالَعَت فتنتك عين
وارجي مشيبك لين يكمل وقارك
والكل يسمع كلمتك لاجل ترضين
عِيشي سعيده وافخري بانتصارك
انك قتلتي كل من هو تحبّين!
أمّا أنا يحرم عليّ انتظارك
يكفي عليّ اللي قضيته من سنين
أسبق خطاياك بْقبول اعتذارك
وتنسين زلاتك وعذرك وتخطين
عِيشي وحيده دام هذا اختيارك
عِيشي لنفسك، لو قدرتي تعيشين!!