صحو - علي الضميان

ليل صبحه جنون وصبح ماله صحو
والعيون.. (العما).. عز الضحا صابها

وحكي لما تقوله ما لـ (حظه) محو
سامعك كل كلمة فسر أسبابها

اكتب أشعار دام الشعر ما به نحو
خل بعض المعاني تعتق إعرابها

مجلس أغراب من ضيم الزمان مزحوا
والليالي تبي تكشف لهم نابها

صمت مزعج وصاح المنغبن ما وحوا
في بيوت ٍ قديمة سكرت بابها

راسبين المدارس كملوا ونجحوا
والمواعيد تسمح كل من غابها

يمطر الغيم بعض أطفال فيه فرحوا
وضحكة الأم صفرا تجمع ثيابها

والدوا في طبيب الحي لو قحقحوا
زيت مقري عليه لحالةٍ هابها

والجريح يتساءل منهم اللي جرحوا
منهو اللي يموت برعشة أهدابها

خصرها هو صحيح مخاصم اللي برحوا
أو مسافة نحرها تتعب ركابها

لعن أبوها وأهلها ليتهم ما سمحوا
ليه تهدي المضرة لأقرب أحبابها

جت معاها جيوش الحسن ما زحزحوا
واحتضر في كلام الهمس بعتابها

لذة اللهو لحظة بعدها صحصحوا
واستباحوا الذنوب بحسرة حسابها

فكر شارد عليه من البداوة فحو
تاه وسط المدينة يلعن ترابها

شاف دم النخيل وكيف فيه انضحوا
قال وين النجوم اش قصة غيابها

ما عرف ليه كل الشامتين مدحوا
كفكف إيديه وأبعد عن أذى كلابها

سبع مرات مات ومثلهن في صحو
يمكن الثامنة لو مات يحيا بها