أسباب السؤال - علي الضميان

شفت في نبرة خطوطك أسئلة
وفي تساؤل ذاتك أسباب السؤال

ما قدرت أعرف حدود المشكلة
دامها في واقع أشبه بالخيال

الفكر أحيان يصنع معضلة
إن تعمق أو صعد فوق الجبال

وإن بقا طافي بموجة ترسله
للظلام الأزرق بليل الضلال

زوبعة أفكار لأسخف مسألة
وفكر واحد ضاق في أوسع مجال

والصغير إن تاه محدن يوصله
يسكن الغربة ويشربها زلال

وإن تغرب عاقل بديرة هله
ينزف أوجاعه وطن في ألف حال

صعب يمكن بعضنا يستسهله
وسهل يلبس بعضنا بثوب المحال

رفض إذعان إن توالد نقتله
وإن خضع يلقى المودة والدلال

قبل يبدا ما تذكر بسملة
وارتبك بعد التحية بالمقال

حولنا أشباه تشكي من بله
رغم هذا يدخلون أصعب جدال

والحقايق نبعها ما نجهله
وإن تنكرنا نعيد اللي يقال

صابني وسواس هذا أوله
والسبب واضح وشرحي حيل طال

الكتابة ذكرتني بأسئلة
وجيت لك مذهول في صدري سؤال