فرح دامي - علي الضوي

ياحزني السالفة ماهي على كيفي
غصب(ن) علي جيتك وسلمتك أيامي

الوقت والناس وجروحي وتخريفي
خلوني أكفر بديني واعلن اسلامي

لا انته صديقي ولا جاري ولا ضيفي
بلشت بك وين ما ارحل يانت قدامي

جيتك .. وصلّت على بيرك مغاريفي
خمسين ركعة ولا زال الورق ضامي..

سلمت لك كل صدقي.. كل تزييفي
يالله تعال اضرب الشاعر وهو حامي

تعال باعذب سحابه واحتضن صيفي
تعال خل الورق يبكي مع أقلامي

تعال ابرسل مع امواجك مجاديفي
أكيد ابلقى غريقٍ .. ساكتٍ .. كامي

تعال وافسر عن ذراعك وخذ سيفي
واطعن عيون الفرح خلّه "فرح دامي"

يا حيف يا همّي الماضي وياحيفي
ضيعت وقتي معاه وضاعت احلامي

ياحزني السالفه لو هي على كيفي
ما كان شفته ولا نسّاني آلامي