الضلع والطرقي - عواض العصيمي
انا عصاي الدرب واذا ضوى
ف الليل مخلابه وسكينه
شبيت لي ضوِ تنفس هوى
مني .. وقهويته فناجينه
وش هم لو صريت وقتي نوى
والبال تمره في عراجينه
خبزي قفار ولاعلي استوى
ولاعجين الوقت بطحينه
ياضلع ياللي في طريقي عوى
والدرب عاثت به سراحيته
زادي قليل ومقتفيني طوى
والعمر تسبقني مساكينه
لاشك راسك في سحاب وروى
والظل في سفحك شرايينه
لاتحسب انّا في تعبنا سوى
يابعد فرق الغيم عن طينه
انا تعبت ارقاك ناب وهوى
وانت اتعبك همي وتكوينه
لاتنشد الطرقي عن اللي غوى
مايحمل الطرقي عناوينه
من يتبع الشمس النجيبه ثوى
ولا تكذب الغدرا مضامينه
الا شفيف الحال والمحتوى
صبحٍ تذر الشمس في عينه