مرثية والده - عوض بن فرج القوانه
يالله يا رب الخلايق يا إله الكاينات
يا واحدٍ ماله شريك ولا لنا غيره إله
يا عالم بالبينات وعالم بالخافيات
مانرتجي غيره ولا معبود بحق سواه
يا رب مكه والمدينه يا مدير الذاريات
جنبنا عن درب الهلاك ودلنا درب النجاه
نسألك تلهمنا الصبر عند المصايب والثبات
واجبر مصيبتنا ومنهو مثلنا تجبر عزاه
الوقت يمضي والليالي مقبلات ومقفيات
والامر للي جابنا فارضه وضللنا سماه
والعمر مهما طال يفني والليالي فانيات
والموت حق وكل نفسٍ خاتمتها للوفاه
والعبد اله يوم ليا وافاه حان اجله ومات
ذي سنة الدنيا وحكم الله على الخلق وقضاه
مير المنايا حدها مثل السيوف المرهفات
والناس ما تبكي فراق الميت إلا من غلاه
وانا على متني من الدنيا حمولٍ كايدات
أثقل من طويق وكرا والنير وجبال السراه
همٍ على كبدي قعد يركي كواياً حاميات
بيح بسدي لين وصلّ صبر قلبي منتهاه
يا مل عينٍ ساهره طول الليال ماتبات
تقول كن بنونها لا جيت اغمضها قذاه
ويا ملل قلبٍ من كثر همه عروقه يا بسات
يلويه من حر المصيبه والقهر تسعين آه
لا واغبوني مات ابوي اللي يحوش الطايلات
ماعاد للدنيا طعم ماعاد للعيشه طراه
كريم سبلا اللي فعوله للقبايل بينات
اللي ليا منه عطى يعطي ولا يتبع عطاه
راع الوفا والمرجله والدين محمود الصفات
من خلقتي لليوم ما اخبر زول فالدنيا شناه
من خلقت الدنيا وهو راع العلوم الطيبات
ريفٍ لربعه والضيوف ولاهل بيته وقصراه
راع المعم اللي ليا جات العلوم الصاملات
كم شيخ قومٍٍ فاللقا يمشي تحت فية عصاه
وابويه اللي عقب موته راحت ايامي شتات
اللي ليا حدتني الدنيا اتذرا في ذراه
ليت المنايا مهلنه للسنين المقبلات
لو الثمن عمري بدل عمري عسى عمري فداه
واحر كبدي لا تذكرت السنين الماضيات
لاواعنا القلب المشقا عقب موته واعناه
مالي على الدنيا حسوفه لو قضى عمري فوات
مدام مات ابويه اغلى شي عندي فالحياه
لو العباير والتوجد والتشكوي والشمات
ترد ابوي اللي توفى كان ما تغلا علاه
ابكي فراقه والعبايز فوق خدي جاريات
واصفق بكفٍ كف واللي حيلتي وش في يداه
والله يلوم اللي يلومك يالعيون الباكيات
مالاعه اللي لاع قلبي ماكواه اللي كواه
تبكي على فقده عيون رجال واطفال وبنات
واللي درا واللي سمع كل بعد موته بكاه
مدام راسي حي ابحيا العمر لا غلى الذكريات
والموت مدري يا محمد ويش سرعه من بطاه
ما والله انسى ابوي مهما راحت الدنيا وجات
واللي له ابٍ مثل ابي والله ليبطي مانساه
عساك يالطايف لهمال المزون الرايحات
نوٍ من المنشا ليا جا فوق قبره هل ماه
يالله سألتك باقرب الاسماء لذاتك والصفات
تبيح ابوي وترحمه يا فارضٍ ركن الصلاه
يالله يا المعبود بدّل سيئاته بحسنات
واغفر ذنوبه يوم يلقاك وتجاوز عن خطاه
يا واسع الرحمه ويا مرس الجبال الشامخات
اجعل له الجنة سكن يا واحد نتبع رضاه
يالله وانا طالبك يارب النجوم المرقبات
يا واحدٍ من رحمته ماخب مخلوق رجاه
عجزت حروف الشعر والقيفان وقفت حايرات
لو اشرب بحور القصايد كل شعري مارثاه