ذيب الوفا برجوم صدري خلاوي - ماجد الزيد
والله لامريت في بال هاويك
وتذكرك يومنْك بالعين تاوي
ايضيق به صدرن يردد حكاويك
يحكيك حبن ما حكابك نزاوي
الله ينساني اذا نمت ناسيك
يوْفى من الظلما لعين العماوي
اغليك اي والله بالحيل اغليك
ياغلى من الحومه لطير النداوي
اول اجي لك وانتثر بين كفيك
واليوم ذيب فراق وصلك يعاوي
ذيب بقلبي يقتنب كل ماطريك
ذيب الوفا برجوم صدري خلاوي
جيت المكان الي اجي له ملبيك
امن اول ٍ يوم الدهر لي مخاوي
وقفت واناظر هذاهي حراويك
وهذا محلك يوم تطرب غناوي
هذا محلّي يوم اقبّل اياديك
وهذا محلِّ فيه للحب راوي
لا الموج ممحي ياحبيبي خطاويك
ولا الريح غطت ضحكتك يالحياوي
كن النوارس صوتها لك يناديك
واليمّ لاقبل للبكى به حراوي
ووه ٍ بثر ووه ٍ بثر ووه تنبيك
كم حسرة ٍ بالقلب عقبك تضاوي
لولا الحيا في عالي الصوت لابكيك
يسمع لجيج القلب من بالصّداوي
خلّ الحزن بالقلب والقاف يكفيك
خوفي لكدّر نومتك وانت زآوي
ما والله ان احد ٍ جبر كسرتي فيك
فرقاك ملْها يا حبيبي مداوي
والله لو لي قدرة ٍ كان لفديك
روحي فداك اليا رفعت العزاوي
شفني وفيت وجيت يمّك اسليك
عند النّصايب طايح ٍ ومْتساوي
والله ينساني اذا نمت ناسيك
يوْفى من الظلما لعين العماوي