توالي عقابيس - ماجد الزيد
تجمعن حولي صفوف(ن)كراديـس
بنـات فكـري خضعـن للقصـيـده
طرقتها تجري كمـا سابـح العيـس
متحدراتـن مـن نـوازن بعـيـده
دعيتهـن والكـل منهـن خراميـس
ووردتهـن فـوق الخشـوم العنيـده
جبري وقافي فـوق روس المفاليـس
رمحـن ركـازه فالكبـود اللهيــده
طقّولي دمـام الحـروب المشاريـس
نويتهـا غــاره لعـيـن البـديـده
لاجيت حرب(ن)يضربون النواقيـس
وان جيت حبّن واهنـي مـن نريـده
صوّت علي رجلن سلاسة عتاريـس
من نسل خالد جاوب الصـوت ميـده
ابشر بعـزك ويـل كـل الاباليـس
الخالـدي ربّـط بليـسـن بقـيـده
ان كان للشيطـان كـرّه وتخميـس
حنـا جيـوش الفتـح حنّـا نشيـده
حنا سلالـة مـن يـدك المتاريـس
قايد جيـوش الفتـح خالـد عميـده1
لاغـار بالعيّـار فابليـس دلعـيـس
ذليـل خـاوي يفـر مثـل الشريـده
كان الفخر منسـب فحنّـا المقابيـس
فريـد مكّـه جدنـا وهـو عقيـده2
خير البشر من قيّس الحـق تقييـس
بن عمّنا وش بعدهـا ويـش ازيـده
وكان الفخر تاريخ معجـم قواميـس
شف الكتب ماهـي سوالـف جريـده
صلنا وجلنا مـن عمانـن لجرجيـس
حكّمن على شرعـن وسنّـة عتيـده
بن زامل الجبري عـذاب المناحيـس
تسعين عامـن مالقـى مـن يكيـده
الحـق مايخفـى ولا يجيـه تدميـس
الله فـرق مابيـن جمـلـة عبـيـده
عيـال خالـد كاسبيـن النوامـيـس
يـوم انهـا بالسيـف يشهـد جليـده
يامـا روينـا ظاميـات العبابـيـس
البرتغالـي غيرنـا مــن يبـيـده
بيض الحبـارى دونهـا بالاناسيـس
ياكم قطعنـا كـف مـن مـد ايـده
ون كانها رفّـت فـروخ القرانيـس
تخمـر الا مـن كاملـن رام صيـده
الكل يفخر في ربوعـه ونـا اقيـس
فخر(ن)بـلا توثيـق مانـي بجيـده
حنّـا حكمناهـا جميـع التضاريـس
موج البحـر شاهـد وبالبـر حيـده
ياكـم قفـرن قبلنـا يـوم مـاديـس
تلقى بـه رسـوم الخوالـد شهيـده
ياما ضربنا مـن جبالـن مخاريـس
لين اخضعت تحت الخوالـد رعيـده
حنّـأ سـلالات الرجـال الاشاويـس
غـرّة قريـش الخالـديـه مجـيـده
والخير فـي كـل البدايـد تقاييـس
كل(ن) خذى من الطيب وافي رصيده
ولّا الفخر عند الذي يعـرف ايقيـس
تقوى الفتـى ربّـه وخوفـه وعيـده
وإذا الفتـى مربـاه غشّ(ن)وتدليـس
ماينفعـه عرقـه ولاهــو يـزيـده
ومن كبرت عظامه بسوق النخاسيس
مـاذاق طعـم العـز والـذل عيـده
اعمـى البصـر ماينفعنّـه فوانيـس
عينـه سـوى متعافيـه او رمـيـده
والّي همومه فوق راسـه عراميـس
ماهـو سـواة الّـي يغنـي نشيـده
اليوم صـارت للرخـوم الهتاريـس
لاقبـر(ن) الا صـاح ينعـى حفيـده
ونـا تزايدبـي فـزوع الكوابـيـس
اصحـى وانـام بذكـر ذاك الفقيـده
ياقبر مقـرن جـاك منـي هناديـس
غربان همّي فوق قبـرك وحيـده 3
فوق القبر فلّن همومي مـن الكيـس
القبـر مشكـى بالسنيـن البلـيـده
مقرن وسال الدمع فـوق القراطيـس
لاتلومنـي ياعـمّ نفسـي زهـيـده
قمـت اتذكـر ماضيـن للفواريـس
والربع من فوق الصحاصح ضديـده
مقرن يصـوت والخوالـد مخاميـس
والبرتغالـي واقعـن فـي هبـيـده
مقرن وسم القلـب زود الهواجيـس
ماهي هواجيـس الهـوى بالخريـده
مانـي بعاشـق للعيـون النواعيـس
عشقـي تواريخـن تطـاول فريـده
القلب حامت بـه توالـي العقابيـس
سـدّن شرايينـه وسـدن وريــده
والكبـد تحمسهـا ليالـيّ تحمـيـس
تقلبـت فـوق السنـيـن الوقـيـده
عـروق قلبـي يبسـن فيـه تيبيـس
عيدان راكن فرعـن فـي صعيـده
الورق ناح وجاوبت نوحـه ام قيـس
حيـف الحبـارى ذكريات(ن)مديـده
وقتـن تبوعتنـا غدوبـه غطاريـس
سقـط البشـر متغطرسين(ن)بسيـده
الوقـت لاكبـر عيـال الهداريـس
ماعـاد ياصـل للاشـاوس بـريـده
واليوم اشوف الوقت كلّـه دهاليـس
كبّر صغير وكـم ذبـح مـن وليـده
العـز عيونـه ذابلاتـن معامـيـس
اعطولـه الـدلّـه لعلـهـا تفـيـده
حافن عليه وحوش غدر(ن)مضاريس
يراقبنـه لـيـن ينـفـذ رصـيـده
اضرب على خمسه بضرب السواديس
واهزّ راسي ووسط جوفـي صديـده
واشرب من الدخان شربي عماريـس
اطفـي واولـع كـل بيت(ن)جديـده
ماهمنـي كثـر الوجيـه الدواسيـس
الي ذبحنـي قـل وجيهـن حميـده
ولاهمني روس الكفر زمـرة ابليـس
الراس شامـخ والخطـاوي سديـده
اسستلـي فـوق النوايـف تئاسيـس
ماهدهـن صلفـات ريح(ن)شـديـده
ولا العيون الي بـروس الجواسيـس
عجزت وهي ترقـب تـدوّر نقيـده
والداب لـو جلـده مملـس تماليـس
سمّـه بنـابـه والله يــرد كـيـده
متحينن قرصة خطـاوي الدواويـس
الـي ورى كـل الغوانـم جهـيـده
نمشي وحنّا مـن بعـاد المراميـس
ومجد(ن)تليد(ن)مالقـى مـن يعيـده
مريتلي مرقـب لطيـف النسانيـس
متبعـدن عـن كـل هـم ونكـيـده
مالي بقعـدات الطـرب والمجاليـس
ماعاينـت همّـي النفـوس السعيـده
ياويـن انـا وياوينهـن التوانـيـس
همّي معلـق فـي ضلوعـي قديـده
مانـي مطولهـا ولوهـي اماريـس
والله لـو طالـت تـذّوب حـديـده
الا ان قلبي فوق حمـر الطعاميـس
يسحب له بقـوس الربابـه قصيـده
1-المقصود هنا خالد بن الوليد رضي الله عنه الملقب بريحانة قريش والذي تتحدر منه قبائل بني خالد المخزومية
2-هنا المقصود الوليد بن المغيرة المخزومي والد خالد (سيف الله المسلول) الملقب بفريد مكة
3-المقصود هنا الملك مقرن بن اجود بن زامل الجبري الخالدي رحمه الله تعالى المقتول عام 995هـ
في معركة جزيرة لنجه ضد البرتغاليين بعد احتلالهم لشرق الجزيرة العربية والخليج العربي لشهر كامل
اعملوا السيوف بالمسلمين وقتلوا الحرائر وحرقوا المساجد حتى مكن الله وتم القضاء على احتلالهم للبلاد