حكاية فالنتين - مبروك بن ماضي
قالت لي العشاق سوو لهم عيد
وش فيك ماعايدتني قبل يومين
اليوم (سطّعشر) وقبل أمس تحديد
من شهر فبراير تلاقوا المحبين
قلت اسمعي وش لي بعرف المقاريد
اللي نقلدهم دواماً في الشين
ماعمرنا خذنا من الغرب مايفيد
ولاعطونا طيلة الوقت شي زين
حنا لنا عاداتنا والتقاليد
ومن قبل هذا طاعة الله في الدين
لو إنّه إلاّ ورد لازرع لك البيد
ورود حمراء مثل منتي تحبين
المشكل إنّه فعل خاطي وتقليد
غربي إلينا صّدروه الملاعين
ياما وياما صاب الاسلام من كيد
كادوا ومازالوا يكيدون للحين
وإحنا كأنّا عن مكايدهم بْعيد
نمشي ولا ندري خطانا الى وين
غلاك يكبر في الحشاء دوم ويزيد
من قبل مسمع عن(حكاية فلنتين)
ملعون ابن ملعون له مكر وِيْريد
يسوّق أفكاره لبعض المساكين
أي حُب ودك نحتفل به و أي عيد
اللي أعْر فِه عندنا بس عيدين