شكى قلبي - مبروك بن ماضي

شكى قلبي من عنادك وطُول الصد والهجران
وياليتك شعرت بْلوعة أشواقي وإحساسي

كذا تبعد وتتركني متيم في الهوى ولهان
كذا تقسى علي وتغيب عنّي يابعد ناسي

رسول الشوق نادى لك حبيبي لاتصم الآذان
ابي تسمع صدى صوتي وتقتل بالأمل يأسي

ابي لطفك يرافقني دواما مو بعض الاحيان
أبي أرفع حبيبي فيك مابين الملا رأسي

رسمتك لوحةٍ في خافقي تزهى بك الألوان
كتبتك لين مل من لون حبري وجه قرطاسي

يعين الله كم هي صعبة الفرقا على الإنسان
يعيش العمر في حسرة كبيرة دوم ويقاسي

ملكت الروح ياخلي وعشت بْداخل الوجدان
لك الله صرت لي أقرب الي نفسي من أنفاسي

يمر الوقت لكن لا طريقة لي الى النسيان
نسيت أنساك ، لاتعجب لاني أذكرك ناسي؟

هويتك والهوى مايرتوي من نبعه العطشان
شربت إمن الوله لين أشتكى من شفقتي كاسي