حي جرح قلبي - محمد الأحمد السديري
جرح الهوا يا عمير ما حد يداويه
غير الذي دماه ماله مداوي
يا عمير انا جرحي من العام شاكيه
باقصى الضمير بثومت القلب هاوي
حي جرح قلبي ونجض مكاويه
قل له بحق الحب يا عمير ياوي
قل له يعف ولا يعذب مصافيه
ان كان قلبه مثل قلبي شفاوي
ان غاب دايم كن عيني تراعيه
وان شفت غيره صرت مثل العماوي
القلب من جور المحبه يباريه
وعقبه بوسط الناس كني خلاوي
عليه جسمي باري الحب باريه
الله لحد يا عمير هو ويش ناوي
بالعلم هو همي وبالحلم اناجيه
وعليه اجاوب بالدجى كل عاوي
ياليتني ما ذقت مره وحاليه
وش جابني لولا أن هذي بلاوي
ابعدت وابعد وانتحا القلب يتليه
واليا جذ حبال قلب الرجاوي
ما يرعوي للي بصوته يناديه
وعزي لقلب ضيعته الهقاوي
الليس سلب كنون عقلي وانا اغليه
عليه يطويني من الود طاوي
لو صحت له بالصوت ماهوب موحيه
وكثر التوجد ما تجيب المناوي
من اول قلبي مهينه وعاصيه
وطعته على ما راد واصبحت غاوي