اخترت بعد الدار عن قرب الانجاس - محمد الأحمد السديري
قالوا وحيد وقلت ماعندي اوناس
وقالوا غريب وقلت بأرض بعيدة
ابعدت مابي شوف ناس من الناس
بعدت عن بعض الملا وتعديده
مطاوع قلبي على كل الأجناس
والبعد عن شوف المكاره يفيده
اخترت بعد الدار عن قرب الانجاس
عن دارهم نلقى ديار جديدة
في وسط نجد اتبع هوا كل نسناس
واطرب لشوف طيورها وتغريده
اعشق ليالي نجد لو انها ادماس
وايامها عندي جنان سعيدة
شمى لعشب رياضها يقعد الراس
ومافات من ساعات عمري بعيدة
شوف الزهر يبعد عنا كل هوجاس
ويريح عن قلب الشقا مايكيده
وحس الرعد في رايح المزن رجاس
دقات عود عند سمعي فريدة
وان قال لي بعض المخاليق لاباس
قلت الهضايم بالضماير مجيدة
الله من هم بالاضلاع غطاس
اقام وسط القلب وابطى شديدة
فكرت بالدنيا بتقدير واحساس
ولا جات لي الدنيا على مانريده
اللي نبى تقطعت عنه الارماس
وعنه اختفت كل العلوم الوكيدة
القلب يبغض كل غادر وبلاس
اللي يلطخ دم الاجواد بيده
واحب من يتعب على كل نوماس
ومن فيض جوده مايمد الزهيده
اللي ليا كادت والارياق يباس
يصبر على كود الامور الشديدة
وللنفس عن طرق المثاليم حباس
يتعب على كل العلوم الحميدة
واحب نجد وكل حبي على ساس
حب بقلبي له قصور مشيدة
عندي وعرها مع سهلها والاطعاس
غابات ورد في زهور نضيدة
برياضها محلا هدد كل قرناس
ان شاف حفان الحبارى يصيده
عدل المناكب لابرق الريش دواس
ماناش في مخلاب كفه يجيده
ياحلو هداته على الجول غلاس
ينحر كثيره ويتعدى الفريدة
اجرد عديم لهايش الخرب فراس
والطايرة لو ترتفع ما تكيده
ايام عجات الهدد كلها اوناس
ياحلو بالخد البياح تهديده