قطرة وصال - محمد السبيعي
ياللي ليا منّي ذكرتك من البال
يغيب كل الكون عنّي وأجيلك
ياموصّلٍ قلبي إلى حدّ الإهمال
(عطني من أيامك نهار) أشتكيلك
ضامي لقا وأشفق على قطرة وصال
من صدتك ماعدت أطمع في سيلك
أروح بك عنّي وأجي لك وتختال
ما كنّ فوق الأرض واحد مثيلك
يحق لك لكن على كلّ الأحوال
ما أبي كثيرك مدّ لي من قليلك
خذني وحقّق لي معك بعض الآمال
لا ياخليلي لاتخلّي خليلك
ياوحشتي من دون صوتك وش يقال؟
عنّي سوى اني ياحبيبي قتيلك
من غاب صوتك والليالي والأزوال
سودا كذا بالضبط تشبه جديلك
والدمع الأزرق ذقت ملحه ولا آزال
ياعذب ليتك ماتقصّر بنيلك؟
هذا حصيلي وأنت ياحسن الاقبال
من غيبتي قلّي وشنهو حصيلك؟
إن كنت مثلي ماعلى حبك جدال
وإن كنت غير الله يسهل سبيلك
تعيش وتقابل لك ألوان وأشكال
وأعيش ما أدوّر حبيبٍ بديلك