راحت - محمد السبيعي

اثر المواجع يا حمد مثل الايام؟
تحسب ضمن عمر المحبّ وسنينه؟

لا هيب لا تشرى ، ولا هيب تنسام
لو يدفع الرجّال ما في يدينه

حشيمة حشامٍ لأجل خاطر حشام
ثمينةٍ تهدى ب( يمنىً ) ثمينه

واللي خذت قلبي هديّه من العام
جتني تردّه ، قلت: عندك رهينه

حتى لو ان البعد في وضع الإتمام
لا من عطيتك شي ، لا ترجعينه

اخذيه دامه يشبهك عشق وأحلام
وإنتي ب( نبلك ) ف( الهوى ) تشبهينه

اخذيه وابكي ، وآنا مثلك ، واذا لام
قلبك عيوني ، قلت: تستاهلينه

دمعٍ على طاري موادعك مقدام
لو قصّر الله يعمي اليوم عينه

راحت وخلتني خصيمٍ ل( الأوهام )
قلبي نهشه الحزن ، وافرغ حنينه

راحت وجا شامت وعاذل ولوّام
ولا كل غايب لا حضر ، فاقدينه

بعض الحضور اشبه ب( طعنات ) جزّام
وبعض الحضور اشبه ب( فرحة ) حزينه

وبعض المفارق مثل حكمٍ بالاعدام
لا مر روحٍ تلّها في يمينه