أمان ياربي - محمد الشهري
قال: لا يغرّك جمال الشكل .. أو سحر العيون
الجمال الصحّ .. أخلاق.. وذرابه.. واتزان
قلت: هذي جُمله اكثر من يردّدها الشيون
وانت أخلاقك جنان وشكلك اكثر من جنان
قال: اجل تتوقع انّي دايم "الأحلى " بكون؟
قلت: اكيد بعيني انت "الاحلى " في كل الزمان
قال: اذا شيّبت بكره وصار لوني .. غير لون
قلت: صدقّني لو انّك شيب .. عمرك ما يبان
قال: لا .. مسّختها ..والعاده انتم تكذبون
قلت: من تقصد ب "إنتم " محَد غيري بذا المكان؟
قال: أقصد كل شاعر فيه مسّ من الجنون
قلت: بسم الله علي انسان ماني حول جان
قال: بطّل.. قلت: أبطل إيش؟؟ يا أحلى حنون
قال: بطّل تاكل بعقلي حلاوه بها اللسان
قلت: لا والله أقول الصدق واحسن بي الظنون
بس انا محتاج وقت .. فعطني من وقتك ثوان
إجتمعنا ذات مره .. للدراسه في شئون
الحلاوه .. والنعومه.. والذرابه.. والحنان
وبعد تفكير ومشورة كل من هم يبخصون
وبعد عدّة إجتماعات.. ونقاشات.. ولجان
وبعد حكْيي عنْك وانت الحكيَ عنّك ذو شجون
تمّ إصدار البيان التالي .. فاسمع للبيان
إنت أسباب البطاله.. والجريمه.. والديون
وانحراف اخلاق هذا الجيل .. والله المستعان
إنتشار الخمر.. والسمّ المخدر.. والمجون
وانهيار السوق .. والإرهاب .. وانواع الهوان
إنت لولاك إنت ماكان امتلت كل السجون
دامك اسباب المشاكل وامتحانك إمتحان
الخلايق طايحين فبعضهم ذبح وطعون
وكل من كانوا اخوان الحين ما عدْهم اخوان
يامفرّق في علاقات الأهالي والبنون
كل هذا إنت تدري ليه صار ؟؟ ومن عشان؟؟
صار باسبابك عشانك موت وفتونك فتون
تقدّر تسوّي بقلوب الناس حفل ومهرجان
شوف لامن جيت تمشي في شوارعهم بهون
خلق تتحاذف عليك من الحلى والهيلمان
واجهزة أمن البلد مستنفره بالمكرفون
"أخلوا الشارع عشان يمرّ عود الخيزران "
وانت ما ترتاح إلاّ لا لبست البنطلون
لجل تسمع عن طلاق فلانه ومقتل فلان
يا امبراطور الحِسان البيض كان الله بعون
كل من عاش بزمانك يا امبراطور الحِسان
الحلى لو كان جنسيّه .. فخلق الله بدون
وانت وحدك تحمل الجنسيّه.. وخذًها ضمان
لو تروح ل "تركيا " أرض الطبيعه والزيون
صاحوا من شوفة حلاك "أمان ياربي أمان "